Markús Orri sigurvegari Bikarsyrpu IV

Helgina 25-27 mars fór fram fjórða mót Bikarsyrpu Taflfélags Reykjavíkur. Að þessu sinni voru 20 keppendur tilbúnir að tefla nokkrar kappskákir.

Ekki var mikið um óvænt úrslit í byrjun mótsins og margar skákir sem kláruðust fyrr en þær hefðu átt að gera. Mættu keppendur í sumum tilfellum nýta tímann sinn betur sem er samt aðeins vinsamleg athugasemd frá mótstjóra.

Aftur að sjálfu mótinu. Eftir 4. umferðir var það Markús Orri sem leiddi mótið efir að hafa unnið sigur á stigahæsta keppenda mótsins Guðrúnu Fanney.

Í 5.umferð mættust síðan Engilbert og Markús. Eftir að hafa mist af vinnings leið í 8. leik náði Engilbert að byggja upp strategísk unna stöðu. Eftir mikið af uppskiptum endaði Engilbert með mun virkari menn og sigurinn fylgdi fljótlega.

5. umferð Engilbert – Markús Orri.

Í þessari stöðu gat hvítur leikið 8.Da4+ sem er gaffall. Hvítur skákar svarta kónginn og á sama tíma hótar svarta biskupunum. Svartur hefur ekkert betra heldur en að leika 8…Rc6 sem valdar biskupinn. Hvítur á hins vegar þá 9.d5 sem vinnur mann og skákina í framhaldi.

Fyrir síðustu umferð var Engilbert einn efstur með 5.0 vinninga. Fast á hæla hans kom Markús með 4.5 vinninga. Guðrún og bræðurnir Örvar og Nökkvi komu síðan næstir á eftir með 4.0 vinninga.

Í síðustu umferð mættust Guðrún og Engilbert og á öðru borði voru það Markús og Örvar.

Í miðtaflinu náði Guðrún að vinna peð og leit út fyrir að þetta yrði frekar öruggur sigur hjá henni. Engilbert náði hins vegar að búa til ákveðið mótspil með að koma peðunum sínum áfram á drottningarvængnum. Guðrún náði hins vegar að setja upp mátnet sem tryggði henni sigurinn.

Í þessari stöðu lék Guðrún 58.g6 sem hótar svarta hróknum og máti á a8-reitnum sem vinnur skákina.

Loka skákin í mótinu var þá úrslita skákin þar sem Markús var með hvítt gegn Örvari

Eftir 39. leiki kom upp eftirfarandi staða.

Hvítur var að enda við að leika 39.b5 Svartur hafði núna val milli þess að leika 39…f5+ eða 39…a5. Örvar valdi seinni kostinn sem gerði Markúsi kleyft að leika 40.g4! Frábær peðsfórn. Hvítur er tilbúinn að gefa g-peðið sem opnar leiðina fyrir h-peðið. Ef svartur fer að eltast við h-peðið fórnar hvítur öðru peði með c4-c5 og þá rennur b-peðið upp í borð.

Örvar reyndi að búa til mótspil með að ýta peðunum sínum á miðborðinu áfram. En allt kom fyrir ekki og náði Markús að vinna skákina.

Með sigrinum var Markús að vinna sína aðra Bikarsyrpu á tímabilinu.

Lokastaðan í mótinu