Taflfélag Reykjavíkur Elsta og virkasta skákfélag landsins
Reykjavíkurmót grunnskólasveita 2024 hefst í húsnæði TR að Faxafeni 12 miðvikudaginn 3. apríl kl. 16.30 með keppni 1.-3. bekkjar. Mótið er sem fyrr samstarfsverkefni Skóla- og frístundasviðs Reykjavíkurborgar og Taflfélags Reykjavíkur.
Mótinu verður skipt í þrennt eins og undanfarin ár; 1.-3. bekkur, 4.-7. bekkur og 8.-10. bekkur. Keppni 4.-7. bekkjar og 8.-10. bekkjar fer fram daginn eftir, fimmtudaginn 4. apríl.
Tefldar verða 7 umferðir með umhugsunartímanum 5 mínútur fyrir hverja skák og bætast 3 sekúndur við eftir hvern leik (5+3). Á þetta við um alla flokka. Allir grunnskólar Reykjavíkurborgar eru hvattir til þess að senda skáksveitir í mótið. Engar takmarkanir eru á fjölda skáksveita og er skáksveitum hvers skóla styrkleikaraðað með bókstöfum (a-sveit, b-sveit, c-sveit og svo framvegis). Í hverri skáksveit tefla 4 keppendur og má hver sveit hafa 0-2 varamenn. Keppanda er heimilt að tefla í eldri flokki en aldur hans segir til um, en þó má einungis tefla í einum flokki (sem dæmi þá má keppandi í 3.bekk tefla í flokki 4.-7.bekkjar, en hann getur þá ekki teflt í flokki 1.-3.bekkjar). Mikilvægt er að liðsstjóri fylgi liðum hvers skóla og er æskilegt að hver liðsstjóri stýri ekki fleiri en þremur liðum.
Dagskrá keppninnar:
Miðvikudagur 3. apríl kl. 16:30-19:15 1.-3. bekkur
Fimmtudagur 4. apríl kl. 16:30-19:15 4.-7. bekkur
Fimmtudagur 4. apríl kl. 19:30-22:15 8.-10. bekkur
Veitt verða verðlaun fyrir þrjú efstu sætin í hverjum flokki. Einnig fær efsta stúlknasveit hvers flokks verðlaun.
Skráning fer fram í gegnum skráningarform sem finna má hér í fréttinni og í gula kassanum á skak.is. Skráningu í mót 1.-3.bekkjar lýkur miðvikudaginn 3. apríl klukkan 15:00. Skráningu í hina tvo flokkana lýkur fimmtudaginn 4. apríl klukkan 15:00. Ekki verður hægt að skrá lið á mótsstað.
Birnukaffi verður opið! Hægt að kaupa veitingar á kostakjörum meðan allir flokkar eru í gangi!
Skráningarform
Þegar skráð lið
Mótið hefur örlítil áhrif á annað mótahald á vegum félagsins. Lokaumferð Öðlingamótsins mun hefjast klukkan 19:30 í stað 18:30 miðvikudaginn 3. apríl og fimmtudagsmót TR verður í sal Skákskólans í Faxafeni 12 (opið á milli) meðan skólamótið er í TR-salnum.