Taflfélag Reykjavíkur Elsta og virkasta skákfélag landsins
Stórmeistarinn Jón L. Árnason er genginn til liðs við Taflfélag Reykjavíkur. Jón þarf ekki að kynna fyrir skákáhugamönnum en hann varð fyrsti Heimsmeistari Íslendinga í yngri flokkum en það afrek vann hann í Cagnes sur mer við frönsku rivíeruna haustið 1977. Jón varð síðar stórmeistari og hluti af fjórmenningaklíkunni frægu.
Jón hefur minna teflt undanfarin ár en staðið sig vel með fyrrnefndri fjórmenningaklíku á undanförnum árum á Heims- og Evrópumótum öldungasveita.
Þungt hugsi Íslenska sveitin í 2. umferð HM öldungasveita 2024, Jón L. Árnason er hér á þriðja borði.
Taflfélag Reykjavíkur fagnar því að fá Jón aftur heim, en eins og langflestir innfæddir íslenskir stórmeistarar hóf Jón taflmennsku með Taflfélagi Reykjavíkur.