Glæsilegur hópur krakka á fyrsta móti Páskaeggjasyrpunnar

Það var mikið fjör í gær þegar fyrsta mótið í Páskaeggjasyrpu Nóa Síríus og Taflfélags Reykjavíkur var haldið í húsakynnum félagsins að Faxafeni 12.  Á áttunda tug barna mætti til leiks en tefldar voru sex umferðir í tveimur flokkum með tíu mínútna umhugsunartíma á keppanda.  Mótahald gekk afburðar vel og var aðdáunarvert hve fagmannlega krakkarnir, sem voru á öllum aldri, báru sig við skákborðið.  Skákstjórn var í öruggum höndum Björns Jónssonar, Sigurlaugar R. Friðþjófsdóttur og Kjartans Maack en Birna Halldórsdóttir stóð vaktina í hinu rómaða Birnu-Kaffi.

Í yngri flokki (2005-2008) voru 46 keppendur skráðir til leiks og þar hafði Sólon Siguringason sigur með 5,5 vinning en næstir í mark með 5 vinninga komu Óskar Víkingur Davíðsson, Róbert Luu og Björn Magnússon.

28 keppendur spreyttu sig í eldri flokki (1998-2004) þar sem Íslandsmeistarinn og fyrrverandi Norðurlandameistari, Vignir Vatnar Stefánsson, sigraði með fullu húsi vinninga en Björn Hólm Birkisson kom næstur með 5 vinninga.  Sex keppendur fylgdu á eftir með 4 vinninga; Bárður Örn Birkisson, Aron Þór Mai, Brynjar Bjarkason, Mikael Maron Torfason, Óðinn Örn Jacobsen Helgason og Þorsteinn Magnússon.

Páskaeggjasyrpan samanstendur af þremur mótum sem öll eru með sama sniði.  Næstu mót fara fram næstkomandi tvo sunnudaga og viljum við í Taflfélaginu hvetja ykkur, krakkar og aðstandendur, til að mæta á þau líka þó að það sé að sjálfsögðu ekki skilyrði að vera með í öllum mótunum.  Þeir sem taka þátt í tveimur mótum fá allir ljúffengt páskaegg frá Nóa Síríus.

Skráningarform hefur nú verið tekið niður en þeir sem ekki voru búnir að skrá sig geta engu að síður verið með í næstu mótum.  Bara nóg að mæta á skákstað og gott að tilkynna sig 15 mínútum fyrir upphaf móts.

Taflfélag Reykjavíkur vill koma á framfæri kærum þökkum til allra krakkanna og aðstandenda þeirra fyrir frábærar undirtektir og vonast svo sannarlega til að sjá ykkur öll aftur næstkomandi sunnudag.

• Myndir
• Páskaeggjasyrpan

Lokastaðan

Yngri flokkur

Eldri flokkur