Fimmtudagsmót Taflfélags Reykjavíkur Fimmtudagsmót Taflfélags Reykjavíkur eru fyrir löngu orðin órjúfanlegur partur af starfsemi félagsins, ekki síður en stærstu viðburðir þess. Mótin hafa farið fram í áratugi og óhætt er að segja að stór hluti skákiðkenda þjóðarinnar hafi einhverju sinni tekið þátt í fimmtudagsmótunum. Mótin fara fram öll fimmtudagskvöld yfir vetrarmánuðina og hefjast stundvíslega kl. 19.30. Tefldar eru sjö umferðir með sjö mínútna umhugsunartíma á keppanda. Notast er við tölvu við pörun og innskráningu úrslita og því ganga mótin hratt og örugglega fyrir sig. Hlé er tekið um miðbik móts og boðið upp á kaffi og meðlæti án endurgjalds. Móti er lokið um kl. 21.30. Mótunum eru gerð skil á stærsta skákvef landsins, www.skak.is, og heimasíðu T.R., www.taflfelag.is. |
