Sólon sigraði á lokamóti Bikarsyrpunnar

Sólon Siguringason er einn af fjölmörgum efnilegum skákmönnum landsins.

Sólon Siguringason (1283) sigraði á sjötta og síðasta móti Bikarsyrpu TR sem fram fór um líðandi helgi. Sólon hlaut 4,5 vinninga og sigldi hann sigrinum í höfn í lokaumerðinni með sigri á Ísaki Orra Karlssyni (1111) en fyrir umferðina voru þeir efstir og jafnir með 3,5 vinning.

Einbeittir keppendur.

Í öðru sæti með 4 vinninga var Árni Ólafsson (1155) en Ísak og Kristján Dagur Jónsson urðu jafnir í 3.-4. sæti með 3,5 vinning þar sem Ísak hlýtur 3. sætið eftir stigaútreikning.

Skákprinsessurnar Ylfa Hákonardóttir og Freyja Birkisdóttir.

Auk verðlauna fyrir lokamótið voru veitt verðlaun fyrir samanlagðan árangur í mótunum sex og var þar hlutskarpastur Jón Þór Lemery. Annar var Kristján Dagur Jónsson og þriðji Ísak Orri.

Hinn sex ára Bjartur Þórisson varð að játa sig sigraðan gegn hinum margreynda Þorsteini Magnússyni.

Spennandi og skemmtilegri Bikarsyrpu er því lokið í ár og verður þráðurinn tekinn aftur upp í haust og aldrei að vita nema fyrirkomulag mótanna breytist lítið eitt.