Taflfélag Reykjavíkur Elsta og virkasta skákfélag landsins
Sigursveit Landakotsskóla í flokki 8-10. bekkjar:
Reykjavíkurmót grunnskóla fór fram 11.12. október sl. Mótið, sem hefur verið haldið frá því á áttunda áratug síðustu aldar, hefur verið samstarfsverkefni Taflfélags Reykjavíkur og Skóla- og frístundasviðs Reykjavíkur, áður Íþrótta- og tómstundaráðs. Mótið er venjulega haldið að vori til eða þegar skákstarfið er venjulega að ljúka í grunnskólum Reykjavíkur. Keppninni í ár var hinsvegar frestað fram á haust vegna heimsfaraldurs og samkomutakmarkana. Sú tímasetning hentar skólunum ekki eins vel og var þátttakan með minna móti.
Sem fyrr var keppt í þremur aldursflokkum, 1-3 bekk, 4-7 bekk og 8-10 bekk. Alls tóku 28 sveitir þátt og var keppt um meistaratitla í opnum flokki og stúlknaflokki.
Flokkur 8-10 bekkjar:
Í flokki 8-10. bekkjar tóku þátt sjö sveitir frá fimm skólum. Tefldu allar sveitir við allar. Öruggur sigurvegari var skáksveit Landakotsskóla en hún hlaut 22 vinn. af 24 mögulegum. A sveit Rimaskóla varð önnur með 15½ vinn. og B sveit Laugalækjarskóla þriðja með 13½ vinn. Stúlknasveit Landakotsskóla hlaut stúlknaverðlaunin.
Flokkur 4-7 bekkjar:
Í flokki 4-7 bekkjar voru tefldar sjö umferðir eftir svissnesku kerfi. Stúlknasveit Rimaskóla vann tvöfalt en þær unnu opna flokkinn og stúlknaflokkinn. Hlaut sveitin 20½ vinn. af 28 mögulegum. A sveit Breiðagerðisskóla varð önnur með 19½ vinn. og A sveit Melaskóla varð þriðja með 17½ vinn.
Flokkur 1-3 bekkjar:
Aðeins sex sveitir mættu til leiks í flokki 1-3 bekkjar og tefldu þær einfalda umferð allar við allar. A sveit Rimaskóla bar sigur úr býtum og hlaut sveitin 18 vinn. af 20 mögulegum. A sveit Ingunnarskóla varð önnur með 15 vinn. og Stúlknasveit Rimaskóla var þriðja með 14 vinn. og hlaut hún einnig bikar fyrir sigur í stúlknaflokki.
Mótsstjóri var Soffía Pálsdóttir frá Skóla og frístundasviði. Skákstjórar voru Jon Olav Fivelstad, Gauti Páll Jónsson og Daði Ómarsson.
Myndir frá keppninni:
