Taflfélag Reykjavíkur Elsta og virkasta skákfélag landsins
Bikarsyrpa Taflfélags Reykjavíkur heldur áfram þegar fjórða mót syrpunnar fer fram helgina 12.-14. febrúar og hefst fyrsta umferð föstudaginn 12. febrúar kl. 17.30. Mótum syrpunnar hefur verið fjölgað og telur hún alls sex kappskákmót sem eru ætluð börnum á grunnskólaaldri (fædd 2000 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.
Við minnum á að mótið er hluti af stigakeppni félagsins sem er í gangi út febrúar þar sem litið er til ástundunar og árangurs. Hér má rifja upp fyrirkomulag stigakeppninnar.
Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.
Mótið er sérstaklega hugsað fyrir krakka sem hafa sótt skákæfingar TR (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.
Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Frítt er í mótin fyrir krakka í Taflfélagi Reykjavíkur en fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.
Dagskrá:
1. umferð 17.30 á föstudegi (12. febrúar)
2. umferð 10.30 á laugardegi (13. febrúar)
3. umferð 14.00 á laugardegi (13. febrúar)
4. umferð 10.30 á sunnudegi (14. febrúar)
5. umferð 14.00 á sunnudegi (14. febrúar). (Lokaumferð + verðlaunaafhending).
Ein yfirseta (bye) er leyfð í umferðum 1-3 og fæst fyrir hana 1/2 vinningur. Tilkynna þarf skákstjóra um yfirsetu fyrir lok umferðarinnar á undan. Hafa má samband við skákstjóra með tölvupósti taflfelag@taflfelag.is eða í síma 899 9268 (Björn) og 867 3109 (Þórir).
Vinsamlegast skráið þátttakendur sem fyrst, það hjálpar við undirbúning mótsins!
Bikarsyrpan samanstendur af sex mótum í vetur. Bikarar og medalíur eru í verðlaun fyrir efstu sætin í
hverju
móti auk áskrifta á Chess.com eða Chesskid.com. Þá verða veitt sérstök verðlaun fyrir samanlagðan árangur á mótunum þar sem í boði verða 5 einkatímar hjá alþjóðlegum meistara fyrir fyrsta sætið, 3 tímar fyrir annað sætið og 2 tímar fyrir þriðja sætið.
Róbert Luu sigraði á fyrsta og þriðja móti syrpunnar en Halldór Atli Kristjánsson sigraði á öðru mótinu.
Hlökkum til að sjá ykkur!
Næstu mót syrpunnar:
- Mót 4: 12.-14. febrúar 2016
- Mót 5: 1.-3. apríl 2016
- Mót 6: 27.-29. maí 2016