Stigahæstu leiða á KORNAX mótinu

Í gærkvöldi fór þriðja umferð fram og voru úrslit flest eftir bókinni þó nokkur jafntefli hafi litið dagsins ljós þar sem stigamunur var nokkur.  Á efsta borði sigraði Fide meistarinn Davíð Kjartansson Jóhann H. Ragnarsson í snarpri skák þar sem Jóhann fórnaði manni snemma tafls.  Davíð varðist vel og svaraði að bragði og hafði sigur í 24 leikjum.  Á öðru borði þurfti Fide meistarinn Einar Hjalti Jensson að mikið fyrir sigrinum á hinum unga og efnilega Oliver Aroni Jóhannessyni í spennandi skák.  Einar hafði sigur eftir 58 leiki en Oliver lék af sér manni í tvísýnu endatafli þar sem Einar hafði þó peði meira og betri stöðu.

Þá sigraði stórmeistari kvenna, Lenka Ptacnikova, Pál Sigurðsson eftir laglega fléttu í miðtaflinu en áður hafði verið mikið um mannatilfærslur.  Omar Salama sigraði svo Vigfús Ó. Vigfússon, einnig eftir góða fléttu sem opnaði kóngsstöðu Vigfúsar upp á gátt og mátnet var ekki umflúið.  Davíð, Einar Hjalti, Lenka og Omar leiða því með fullu húsi að loknum þremur umferðum en átta keppendur koma næstir með 2,5 vinning.

Í fjórðu umferð sem fer fram á sunnudag mætast á efstu borðum Davíð og Omar, Lenka og Einar, og Daði Ómarsson og Þór Már Valtýsson.

• Úrslit, staða og pörun
• Dagskrá og upplýsingar
• Skákmeistarar Reykjavíkur
• Mótstöflur síðustu ára
• Myndir (JHR)